“என்ன சார் அநியாயமா இருக்கு? ஈரானோட ஆயில் ஃபீல்டுகளை அமெரிக்கா நேரடியா கேப்ச்சர் பண்ணணும், இல்லாட்டி மறைமுகமா அதுக்கு ஃபேவரபிளா இருக்கிற கவர்மென்டா மாத்தணும்கிறதுதான் டிரம்ப்போட எய்ம்னு அப்பட்டமா தெரியுதே...”
காலை நடைப் பயிற்சி முடிந்து பூங்கா மர நிழல் அமர்வில் இவ்வாறு சொன்னார் நண்பர். (ஏற்கெனவே அந்த சிமென்ட் பெஞ்ச்சில் உட்கார்ந்திருந்த இளைஞர்கள் எங்களைக் கண்டதும் அவர்களாகவே எழுந்து கொண்டார்கள். நாள்தோறும் நாங்கள் அதில் மாநாடு நடத்துவதைக் கவனித்திருப்பார்கள் போல. இந்தக் கால இளைய தலைமுறையினருக்கு மூத்தவர்கள் மீது மரியாதையே இல்லை எனறு யாரும் பேசாதீர்கள்.)
‘அவரே தொடர்ந்தார். “நேத்து டிவி சானல்ஸ்ல ஈரான் வார் நியூஸ் கவனிச்சேன். பேப்பர்லேயும் விரிவா போட்டிருந்தாங்க. ரெண்டு டீப்பான ஆர்ட்டிக்கிள்ஸ் படிச்சேன். டிரம்ப் எந்த அளவுக்குப் போறாருன்னு புரிஞ்சது.”
பூங்கா பெஞ்ச் அமர்வின் மற்ற நீதிபதிகளும் அவரவர் படித்த, கேட்ட தகவல்களைப் பதற்றத்தோடு பகிர்ந்தார்கள். இது உலகப்போராக மாறுமோ என்ற கவலையை வெளிப்படுத்தினார்கள். உலக அளவில் வரக்கூடிய நிர்ப்பந்தங்களால் அப்படிப்பட்ட நிலைமை தடுக்கப்பட்டுவிடும் என்ற நம்பிக்கையையும் (விருப்பத்தையும்) தெரிவித்தார்கள்.
பேசுபொருள் இதுதான் என்று காதில் விழுந்ததால், வேறு சிலரும் நடையை நிறுத்திவிட்டுச் சூழ்ந்துகொண்டார்கள்.
“இவ்வளவு நேரம் நாமதான் பேசிக்கிட்டிருக்கோம். சார் எதுவுமே சொல்லலையே...”
“சார் எதுவும் சொல்லலை.. ஆனா அவர் முகத்துல ஒரு சிரிப்பு இருக்குதே... சார் நாங்க இதையெல்லாம் பேசுறதப் பார்த்தா உங்களுக்கு ஹியூமரஸ்ஸா இருக்கா?”
“அய்யய்போ... நீங்க இதையெல்லாம் பேசணுங்கிறதுதான எப்பவுமே என்னோட விருப்பம்...”
“அப்ப ஏன் அந்தச் சிரிப்பு?”
“இல்லை.. ஈரானை எழுந்திருக்கவே முடியாத அளவுக்கு அழிச்சிட்டுதான் ஓய்வேன்கிற மாதிரி டிரம்ப் அறிவிக்கிறாரு. ஈரான் எதிர் நடவடிக்கை எடுக்குது. ஆனாலும், நம்ம ஊருல கேஸ் சிலிண்டர் நெருக்கடி ஏற்பட்டதுக்கு ஈரான் அரசாங்கம்தான் காரணம்னு குற்றம் சொல்றோம்.. ஈரானுடைய பிடிவாதத்தாலேயும் நடவடிக்கையாலேயும்தான் இங்கே பெட்ரோல் பங்க்குகள்ல நீள நீளமாக வரிசை நிக்கிதுன்னு புலம்புறோம்... அதை நினைச்சேன். அந்த வேதனைச் சிரிப்பை முகம் காட்டிக்கொடுத்திருச்சு போல.”
சில நொடி மௌனம் காற்றோடு கலந்து வீசியது. ஒருவர் அதை முறித்தார்.
“கேஸ் தட்டுப்பாடு மட்டுமில்லை சார், விலையெல்லாம் எகிறிக்கிட்டுப் போகுது. ஆட்டோ, கேப், பைக் டாக்ஸிக்கெவ்லாம் தட்டுப்பாட்டைக் காட்டி கட்டணத்தை ஏத்துறாங்க...“
“இது முடிவுக்கு வருமா? எப்ப வரும்? எப்படி வரும்?”
“முதல்ல சொன்னீங்கள்ல, அது மாதிரி உலக அளவுல வரக்கூடிய நிர்ப்பந்தத்துனால போர் நின்னுடும்னுதான் நினைகிறேன். அதுக்குள்ள எல்லாத் தரப்புக்கும் பெரிய இழப்புகள் ஏற்படும். ஆனா...”
“ஆனான்னு இழுக்கிறீங்க?”
“ஏதோ நிர்ப்பந்தங்களால போர் நிற்கும். ஆனா எந்த நிர்ப்பந்தத்தாலேயும், ஏறுன விலைகளும் கட்டணங்களும் இறங்காது.”
நிகழ்ச்சி நிரலின் நிறைவுக் கட்டமான தேநீர்க் கடையில் வழக்கமான விலைதான் கேட்டார்கள். இவர்களும் திடீரென்று ஏற்றிவிடக்கூடாதென்ற நினைப்புடன் பருகிய காஃபி, டீ சூடு அதிகமாக இருந்தது.
[0]
முகநூல் (மார்ச் 27இ 2026) பதிவு
No comments:
Post a Comment