உலக அளவில் தீர்க்கப்பட வேண்டிய பல தீவிரமான சிக்கல்கள் இருக்கிற நிலையில், உலக வரைபடத்தைத் திருத்துவது முக்கியமா? இப்படியொரு கேள்வியுடன் அமெரிக்க அரசு மட்டும் ஒற்றையாக எதிர்த்து வாக்களிக்க, 6 நாடுகள் வாக்கெடுப்பைப் புறக்கணிக்க, 22 நாடுகளின் பிரதிநிதிகள் ஆட்டத்திலேயே கலந்துகொள்ளாதிருக்க, 164 நாடுகள் ஒருமனதாக ஆதரிக்க ஐக்கிய நாடுகள் சபை புதிய உலக வரைபடத்தை ஏற்கும் தீர்மானத்தை செப்டம்பர் 4 அன்று நிறைவேற்றியுள்ளது.
உலக வரைபடத்தைப் பாட நூல்களிலும், சுற்றுலா நிறுவனங்களின் வரவேற்பறைகளிலும், பல அலுவலகங்களின் சுவர்களிலும், அனைத்து நாடுகளும் பங்கேற்கும் நிகழ்வுகளிலும் பார்த்திருப்போம். இத்தனை ஆண்டுகளாக அதில்தான் கண்டங்களையும் நாடுகளையும் தீவுகளையும் கடல்களையும் சுட்டிக்காட்டி வந்திருக்கிறோம். வரைபடத்தில் தனது நாடு எங்கிருக்கிறது என்று காட்டத் தெரியாத ஒரு மாணவன், ஆசிரியரிடம் “என் நாட்டை நான் காட்டிக்கொடுக்க மாட்டேன்” என்று சொன்னதாக ஒரு நகைச்சுவைத் துணுக்கு உண்டு.
இன்றளவும் நடைமுறையில் இருக்கிற அந்த உலக வரைபடத்தின் வயது 457. ஃபிளாண்டர்ஸ் (தற்போது பெல்ஜியம் நாட்டின் ஒரு பகுதி) என்ற வட்டாரத்தைச் சேர்ந்த கணித அறிஞரும் வரைபட வல்லுநரும் பேரண்டவியல் ஆய்வாளருமான ஜெரார்டஸ் மெர்கேட்டர் 1569ஆம் ஆண்டில் இதை உருவாக்கினார். அன்றைய நிலையில் கப்பல் மாலுமிகள் தங்களின் பயணங்களைத் திட்டமிடுவதற்கும் நாடுகளின் தொலைவுகளை அறிவதற்கும் இது பயன்பட்டது. அதற்கு முன்பாகவும் சில அறிஞர்கள் இந்த முயற்சிகளை மேற்கொண்டது உண்டு என்றாலும் இந்த வரைபடம்தான் பெருமளவுக்குத் துல்லியமாக அமைந்து, “மெர்கேட்டர் வரைபடம்” என்றே பெயர் பெற்றது.
கோளமும் தட்டையும்
தட்டையாக இருப்பதாகக் கருதப்பட்ட பூமி உண்மையில் கோள வடிவமானது என்ற கருத்து இரண்டாயிரத்து ஐநூறு ஆண்டுகளுக்கு முன்பே, பித்தாகரஸ், பிளேட்டோ உள்ளிட்ட கிரேக்க அறிஞர்களால் முன்வைக்கப்பட்டது. இருநூறு ஆண்டுகளுக்குப் பிறகு அரிஸ்டாட்டில் செயல்முறைச் சான்றுகளால் அதை நிறுவினார். மேலுமொரு நூற்றாண்டுக்குப் பிறகு, எகிப்தில் வாழ்ந்த கிரேக்க அறிஞர் எரடோஸ்தனீஸ் 95 விழுக்காடு துல்லியத்துடன் அதை நிலைநாட்டினார். ஆகாய விமானங்களும் செயற்கைக்கோள் படங்களும் பூமியின் கோள வடிவம் பற்றிய ஐயத்தை முற்றிலுமாகத் துடைத்துவிட்டன.
இந்த உண்மையின் அடிப்படையில் பூமியின் கோளவடிவ மாதிரிகள் உருவாக்கப்பட்டு கண்டங்களும் நாடுகளும் வரையப்பட்டன. முப்பரிமாணக் கோள வடிவச் சித்தரிப்பை, இரட்டைப் பரிமாணமாக, சுவரிலோ தரையிலோ விரித்து வைத்துப் பார்க்கக்கூடிய வகையில், திரைகளிலும் தாள்களிலும் தட்டையாக வரைந்தபோது ஒரு சிக்கல் ஏற்பட்டது.
மாறிய அளவுகள்
துருவப் பகுதிக்கு அருகில் உள்ள ஐரோப்பாவும் வட அமெரிக்காவும் அளவில் பெரிதாகவும், நிலநடுக்கோட்டுப் பகுதியில் உள்ள ஆப்பிரிக்கா, தென் அமெரிக்கா, ஆசியா ஆகியவை சிறியதாகவும் தோற்றமளிக்கின்றன. எடுத்துக்காட்டாக, உண்மையான நிலப்பரப்பில் ஆப்பிரிக்கா, கிரீன்லாந்தை விட 14 மடங்கு பெரியது. ஆனால் மெர்கேட்டர் வரைபடத்தில் இரண்டும் ஒரே அளவில் காட்சியளித்தன. பல தலைமுறைகளாகப் பாடப் புத்தகங்கள் வழியே பதிக்கப்பட்ட இந்த நிலப்பரப்புச் சித்தரிப்புப் பிழை, வடக்குலக நாடுகளே உலகின் மையமும் அதிகாரமும் கொண்டவை என்ற காலனிய மேலாதிக்கச் சிந்தனைக்கு (ஐரோப்பிய மையவாதம்) புவியியல் சார்ந்த உளவியல் அங்கீகாரத்தை ஏற்படுத்தியது.
கோளத்தில் உள்ள வரைபடத்தைத் தட்டையாக மாற்றுகிறபோது அளவுகள் மாறுபடுவது தாலமி காலத்திலேயே கண்டறியப்பட்டது. அதைச் சரிசெய்ய அவர், கூம்புவடிவ அமைப்பில் வளைந்த கோடுகள் கொண்ட இரண்டு வரைபடங்களை அவர் அறிமுகப்படுத்தினார். அவரும், மெர்கேட்டர் உள்ளிட்ட வரைபடக் கலைஞர்களும் தங்களின் அனுபவ அறிவின் அடிப்படையில் இதை உணர்ந்திருந்தார்கள். கணித அடிப்படையில், தவிர்க்க இயலாத இந்த மாறுபாட்டை 1827ஆம் ஆண்டில் நிறுவிக் காட்டியவர், ஜெர்மனியைச் சேர்ந்த கணிதவியலாளர் கார்ல் ஃபிரீட்ரிச் காஸ். ஒரு கோளத்தின் மேற்பரப்பை, அளவுமாறுபாடின்றித் தட்டையான தளமாக மாற்றுவது கணித அடிப்படையில் சாத்தியமே இல்லை என்றார் அவர்.
கால்–பீட்டர்ஸ்
இத்தனை காலமாக இந்த வரைபடமே புழக்கத்தில் இருந்துவரும் நிலையில், நிலமும் நீருமாக உள்ள புவிப்பரப்புகள் சரியான அளவில் காட்டப்பட வேண்டும் என்ற சமூக அறிவியல் கருத்தை ஜெர்மனியின் வரலாற்று ஆய்வாளர் ஆர்னோ பீட்டர்ஸ், சென்ற நூற்றாண்டின் பிற்பகுதியில் முன்வைத்தார். மெர்கேட்டர் வரைபடம் ஐரோப்பிய மையவாதத்தை வளர்ப்பதாகவும், மூன்றாம் உலக நாடுகளைக் குறுகியதாகக் காட்டுவதாகவும் சாடிய பீட்டர்ஸ், உண்மையான அளவுகளைச் சித்தரிக்கும் வரைபடத்தை 1973-இல் வெளியிட்டார். அதற்கு 120 ஆண்டுகள் முன்பாக ஸ்காட்லாந்து நாட்டவரான ஜேம்ஸ் கால் அதே போன்ற வரைபடத்தை உருவாக்கியிருந்தார். அந்தப் புதிய வடிவத்துக்கு கால்–பீட்டர்ஸ் வரைபடம் என்ற பெயர் சூட்டப்பட்டது.
அரசியல் ஏற்பு
இவர்களின் இந்தத் தொழில்முறை முயற்சியைப் பின்னர், ஆப்பிரிக்க ஒன்றியம் போன்ற பல்வேறு நாடுகளின் கூட்டமைப்புகள் ஏற்றுக்கொண்டன. அந்த ஏற்பு அரசியல் வடிவமெடுத்தது. ஐ.நா. சபையில் டோகோ நாடும் ஆப்பிரிக்க ஒன்றியமும் இணைந்து தீர்மானத்தை முன்வரைத்தன. இந்த செப்டம்பர் 4 அன்று நடந்த வாக்கெடுப்பில், தென் ஆப்பிரிக்கா, இந்தியா, பாகிஸ்தான், சீனா, கியூபா, வியட்நாம், லாவோஸ், வடகொரியா, இலங்கை, ஆஸ்திரேலியா, பிரான்ஸ் உள்ளிட்ட 164 நாடுகள் ஆதரவாக வாக்களித்தன. உக்ரைன், செர்பியா, எஸ்டோனியா, ஜார்ஜியா, லிதுவேனியா, மால்டோவா ஆகிய 6 நாடுகள் வாக்கெடுப்பைப் புறக்கணித்தன. 22 நாடுகளின் பிரதிநிதிகள் வாக்கெடுப்பில் கலந்துகொள்ளவில்லை.
193 நாடுகள் அங்கம் வகிக்கும் ஐ.நா. சபையில் அமெரிக்கா மட்டும் தீர்மானத்தை எதிர்த்து வாக்களித்தது. 6 நாடுகள் புறக்கணித்ததிலும், 22 நாடுகளில் வர முடியாமல் போன பிரதிநிதிகள் தவிர்த்து மற்றவர்கள் கலந்துகொள்ளாததிலும் அமெரிக்க அரசுடன் உரசிக்கொள்ள வேண்டாம் என்ற அனுசரிப்பு உத்தியும் இருக்கிறது. ஆயினும் புவியியல் உண்மைக்கு மதிப்பளிக்கும் வகையில் தீர்மானம் நிறைவேறியது.
நாட்டாமைக்கு சவால்
தீர்க்கப்பட வேண்டிய உலகளாவிய பல முக்கியப் பிரச்சினைகள் இருக்கிறபோது வரைபட மாற்றம் ரொம்ப முக்கியமா என்று அமெரிக்க அரசின் தூதர் தீர்மானத்தின் மீதான விவாதத்தில் கூறினார். ஆனால், உளவியல் அடிப்படையில் மற்ற எந்த நாட்டையும் விட தன்னை ஆதிக்கம் செலுத்தும் நிலையில் வைத்துகொள்ளும் வரைபட வாய்ப்பை இழக்க அமெரிக்க அரசு விரும்பாததே எதிர்ப்புக்குக் காரணம். உலக அரசியல் வல்லுநர்கள் இதைச் சுட்டிக்காட்டுகிறார்கள்.
பழைய வரைபடத்தால் கிடைத்துவந்த குறியீட்டு அதிகாரமும், மையப் புள்ளியாகக் காட்டும் பிம்பமும் கைநழுவுவதை அமெரிக்க அரசால் எளிதில் ஏற்க முடியவில்லை. ஆப்பிரிக்க நாடுகள், புவியின் தென்பகுதி நாடுகள் ஆகியவற்றின் குரல் வலுப்பெறுவதையும், வரலாற்றுச் சீர்திருத்தங்கள் முன்னெடுக்கப்படுவதையும் அமெரிக்கா தனது தனி நாட்டாமைக்கு விடுக்கப்படும் சவாலாகவே பார்க்கிறது.
இந்தியா உள்ளிட்ட நாடுகள் தங்களுடைய முக்கியத்துவம் குறைத்துக் காட்டப்பட்டு வந்ததற்கு ஒரு மாற்று நடவடிக்கையாக இதை ஆதரித்தன. நாடுகளின் சமத்துவத்தை நோக்கிச் செல்வதில் புதிய வரைபடம் பங்களிக்கும் என்ற அணுகுமுறையோடு ஐந்து சோசலிச நாடுகளும் ஆதரித்துள்ளன.
எப்போது நடைமுறையாகும்?
இப்போது தீர்மானம் வெற்றிகரமாக நிறைவேற்றப்பட்டுவிட்டது என்றாலும், கண்டங்களையும் நாடுகளையும் சரியான அளவுகளில் காட்டும் புதிய “சமத்துவ பூமி” வரைபடம் உடனடியாக நடைமுறைக்கு வந்துவிடாது. ஏனெனில், உலக நாடுகளின் அரசுகள் கட்டாயமாகச் செயல்படுத்தியாக வேண்டிய விதிகளின் கீழ் இது வரவில்லை. மேலும், பள்ளிப் பாடங்கள், பல்கலைக் கழக நூல்கள், அரசாங்க நிர்வாகங்கள், வணிக மையங்கள் ஆகியவற்றிலும், நவீன டிஜிட்டல் ஏற்பாடுகளிலும் திருத்தப்பட்ட வரைபடத்தைப் படிப்படியாகத்தான் சேர்க்க முடியும். உலக சமுதாயம் உளவியலாக ஏற்பதற்கும் சிறிது காலம் பிடிக்கும். எப்படியும் 20 முதல் 30 ஆண்டுகள் வரை ஆகக்கூடும் என்று வல்லுநர்கள் கூறுகிறார்கள்.
உலக வரைபடம் வெறும் கோடுகளும் வண்ணங்களும் அல்ல. மனித சமுதாயம் உலகத்தைப் பார்க்கும் கண்ணோட்டத்தின் பிரதிபலிப்பே அது. காலனியக் கட்டமைப்புக்கு சாதகமாகவும் அமைந்த காட்சிப் பிழையைத் திருத்தி, அனைத்து நாடுகளுக்கும் உரிய உண்மையான புவியியல் இடத்தை வழங்குகிற 'ஈக்வல் எர்த்' வரைபடம், உலக உறவுகளின் சம நிலையை நோக்கி முக்கியமானதொரு அடியை எடுத்துவைக்கிறது.
[0]
-‘தீக்கதிர்’ நாளேட்டின் ஞாயிறு (செப்டம்பர் 27, 2026) ‘வண்ணக்கதிர்’ இணைப்பில் எனது கட்டுரை
